بجد اشتقت لجو الرحله

في الفتره الاخيره انشغلت مره عن النت بكبره..

بدأت في تحقيق حلمي الثاني الي هو تابع للحلم الاول والحمد لله
حلمي الاول كان اني ادرس حاسب عشان اصير موظفه بروفشنال في بنك وبعد ما تخرجت قعدت سنه في ضياع واحباط بس كنت احاول ادور الطريق الي اوصل فيه  فدرست في البرتش كانسل على اساس اخذ دبلوم انجليزي.. بس الحمد لله اختصرت الطريق لما انقبلت في المعهد المصرفي دبلوم اعمال ماليه كان بجد حلم كنت متوقعه انه ١٪ يحصل بس الحمد لله -الله كتب لي اياه - مع انه حسافه انه مش دبلوم عالي بما اني ماخذه البكالوريوس بس يظل انه شهادته قويه وتستاهل الشقى..
وطبعا المعهد المصرفي بالرياض فقررت اني احقق حلم  من احلامي الغبيه اني اسكن بسكن كله بنات وفله ووناسه .. ونقلت للسكن مع اني مو مرتاحه مره بهذا السكن بس بغيره لسكن ثاني الترم الجاي ان شاءالله وتصير الامور كلها تمام بإذن الله
وتقريبا انزل لاهلي الدمام  كل ويكند وبعضها اروح فيها لبيت خالتي بالرياض
مع انه تغير كبير بحياتي لكن احس اني اخذته بالطريقه الايجابيه اني صرت وحده اقدر اعتمد على نفسي واتعلم كيف اتعامل مع الحياة لحالي.. <<===فلسفه
اصعب شي لما اجي عند اهلي نهاية الاسبوع ويجي يوم الجمعه الي لازم ارجع فيه.. تجيني ضييييقه ذاك اليوم.. واقرر اني ما اجي الاسبوع الي بعده عشان ما اتعب نفسيا كذا لكن القى نفسي حجزت بالقطار وجيت الاسبوع الي بعده 

هذي اغراضي اول ما وصلت وقعدت ارتبها من الحماس

لما تبين تعطين الناس المهمين في حياتك (صديقتك) حقهم.. لكن الظروف مو راضيه تسمح

ولما تبي تعتذر من هالتقصير.. لكن الاعذار ما تقنع

وش الحل في هالحاله

ليلة ١٥ كنت قاعده اقراء بجنب شباك غرفتي مدري وش الي خلاني افتح الشباك عشان اشوف الجو

بصراحه الجو كان خطيير غريبه الشرقيه هاليومين وهذا الجو

واطلع راسي من الشباك الا القمر منور بشكل اليم

قلت ما يبيلها قشيت الزوليه وفرشتها عالبلكونه الي قدام الغرفه وطحت تصوير

طبعا الصور مب لين هناك بس ابي احس احساس اني صورت ذيك اللحظه

هاليومين امر بمرحلة ركود..مافي اي نشاط بالحياة  

ابي اخلص كم شغله براسي ومدري وش الي مربطني

اولها ابي اصبغ غرفتي اوف وايت<<==الا وش رايكم باللون

وابي اخلص لي كم فكرة تيشيرت وووووو  

قاعده ادور على شنطه حلوه وعمليه يفضل انها تكون سوداء وسيرها طويل تعبت وانا ادور<<<=== الي دارت بالسوق هاليومين تسعفني

.

.

.

فائده:

قولوا هذا الدعاء "للهم إن كان رزقي في السماء فأنزله ، وإن كان في الأرض فأخرجـه وإن كان بعيــداً فقربـه ، وإن كان قريبــاً فيســره وإن كان قليـــلاً فكثــره ، وإن كان كثيرا فبـارك لي فيـه"

وادعو لي معاكم