السلام عليكم ورحمة الله وبركاته ..

اممم ما زالت مشكلتي مع العناوين ، ما ادري وش اكتب فيها عاده .. laphappy ،
كل عام وانتوا بخير ، وكل عام وانتم بصحه .. وكل عام وانتم الى الله اقرب ،

My new iPhone

في نصف رمضان كان فيه تخطيط لرحلة في ولاية NSW والي سدني تكون عاصمتها .. ساكنين في سدني ولا قد طلعنا منها لشي بعيد ، على كبر الولاية ..
اجتمعنا 3 وتم الاقرار بأن تكون الرحله بعد حفل المعايده للسعودين المقام من النادي السعودي .. وكان الحفل يوم الجمعه 3 .. قررنا نمشي السبت الفجر .. وبما ان الاثنين كان عيد العمال في استراليا وإجازه رسميه ..
فكانت الرحله تستمر الى يوم الاثنين بالليل .. وضعنا خط لرحلتنا .. بأن نحرك من سدني الى نقطة نهايه في يوم السبت ومن هناك نرجع لسدني .. وبالطريق نوقف ونتفرج على الاشياء .. بدون تخطيط مسبق للأماكن الي بنزورها
خط النهايه كان حديقة حيوان اسمها mogo zoo .. والي هي النقطه B بالخريطه فوق ..

جداً جميله الحديقه على صغرها .. الحيوانات قريبه منك جدااااااً ، والاسد الابيض يستاهل العنوه .. والغزال يزنن ، ودي اكله
المهم طلعنا من الحديقه الظهر .. ورجعنا لأقرب مدينه Batemans Bay .. وصلنا هناك واخذنا فره بالمدينه وتعبنا على ما حصلنا سكن
كل شي فل .. صلينا ورقدنا الى الساعه 7 بالليل .. صحينا وطلعنا نتمشى ندور اي شي بالمدينه ممكن نسويه .. لكن ما كان فيه الا بوب ، ولا لنا بالاشياء هذي ..
لكن الحمد لله لقينا سينما وكانت مضحكه جداً ..دخلنا وكان اقرب فلم Journey to the Centre of the Earth اخذناه وكان باقي 5 دقايق ويبداً رحنا للقاعه
الا فيه صف وش طوله واقفين سألت واحد اذا هو نفس فلمنا قال ايه نفس الفلم .. انتظرنا لما انتهى الفلم الي بالداخل وطلعوا الناس ودخلنا احنا ..
السينما كلها ما فيها الا قاعتين بس .. و فلم ورى فلم هههههههه ، بعد الفلم طلعنا واخذنا لنا عشاء ورحنا للشقه جلسنا نسولف شوي ونمنا ..

صحانا عيسى على صلاة الفجر .. صلينا واتفقوا ينامون الى الساعه 7 وبعدها نسلم الشقه ونكمل الطريق الى مدينة Nowra وخلال الطريق فيه اكثر من شاطئ حلو
ناموا هم انا ما قدرت انام وجلست اتفرج على فلم بالاب توب الين جت 7 صحيتهم ومشينا الى Nowra في الطريق شفت لوحه مرسوم فيها كناغر واسم شركه ومكتوب بعد 500 متر
لفيت لها و قالوا الشباب وين وين .. قلت مدري بس خلونا نشوف وش موجود هنا .. دخلنا للشركه الا ما فيها شي وخاويه على عروشها وشكلهم نايمين لاننا جيناهم تقريباً 8 الصباح
طلعن بنرجع للخط السريع .. لكن شفنا لوحه تقول يسار الهاي وي ويمين شاطئ مدري وشو .. قلت شباب الشاطئ ..؟
قالوا توكل على الله .. مشينا ومشينا ومشينا بالسياره.. ملينا وحنا نمشي بالسياره.. لين ما وصلنا للشاطئ وكنا ننزل زي الجبل بالسياره ونشوفه على يميننا كان شي خيال ،

شوفوها كبيره هذي ..

الشاطئ رااائع .. وقفنا السياره ومشينا للشاطئ ، جلست اصور .. الا اشوف الكناغر تطامر يمين صورتهم على عجل ولا صوره حلوه ..ههههههه ،
جلسنا شوي و رجعنا للسياره ، لما جينا نركب شفنا العالم مجتمعه في موقف السيارات والطيور توقع على يدينهم ..
حطينا شوي شبس بيدنا وكان شبس حار .. ياكل شوي ولا يعجبه ويطير .. ههههههه طبعاً انا كنت اخر واحد لاني خايف وبرضوا اول محاوله لما جا الطير يوقع على يدي رميت الشبس و هجيت
الثاني عيا يطير ..الى ان رميت الشبت على الكرسي ونزلته غصب ههههههه ،
وصلنا Nowra وكالعاده فره في البلد .. واخذنا لنا سكن ونمنا .. لكن ذا المره بسبب تغير الوقت من شتوي الى صيفي .. وحنا نايمين تقدمت الساعات ساعه كامله .. يعني لما جت
الساعه 7 بجوالاتنا على طول تغيرت الى 8 بسبب ان التوقيت الصيفي يتقدم ساعه تخربط وقتنا .. وصحينا 9 .. طلعنا نبي اي شي ناكله او كالعاده سينما نشوف فيها فلم
لكن جميع المحاولات باءت بالفشل و بصيص النور كان من دومينوز بيتز .. هو الوحيد الي فاتح .. طلبت وانا طالع من المحل بركب السياره انتظر الطلب ..
الا واحد يناديني علي علي .. الا اشوف الدكتور عمر المسند بسيارته ، استغرب وانا استغربت الصدفه العجيبه .. افادنا جزاه الله خير عن رحلتنا الي بتكون بكره ..واعطيناه عنوان الشاطئ
تعشينا ونمنا ..

من بكره صحينا على صلاة الفجر وناموا هم والوعد الساعه 7 .. انا جلست ما عندي شي اسويه ، مسكت الجوال وصرت اتصفح الجرايد ..
ما دريت الا انا نايم وصحيت الساعه 9 واصحيهم وحالتنا حاله وبسرعه بسرعه بسرعه .. كانت وجهتنا اليوم تنتهي بسدني تبدأ بـ
كياما* بعدين ولونقونق ثم الى سدني بنفس اليوم .. توكلنا على الله ومشينا ..
وصلنا كياما وعلى طول رحنا lookout كان في اعلى جبل ومطل على الديره والشاطئ وكل شي .. شي لا يوصف ،

كان امامنا بعد اللوك اوت 3 شلالات واحد منهم كان مقترح من الدكتور عمر .. قلنا معنا وقت طويل نزورهم الثلاثه .. مشينا للأول ..
وهذي صور من الطريق للشلال الاول ..

اعجبتني حركة الفوكس بالصورتين الي فوق عندي صور للفوكس على الحيونات وانتم بكرامه ،
لكن حبيتهم اوت اوف فوكس ..

وصلنا للشلال الاول مع ان الدكتور عمر نصحنا بشلال ثاني لكن هذا كان الاول في الطريق وصلنا و وقفنا السياره
ودخلنا على الانفو قالوا لنا من هنا .. مشينا 700 متر .. لما انهد حيلنا .. شفنا الشلال وريحنا عنده شوي .. ورجعنا للسياره 700 متر ايضاً ..
وصلنا للسياره ما نبي اي شي الا سرير نريح فيه .. كيلوا ونص مشي وكأنك تطلع جبل .. تعب تعب ..

كنسلنا الشلالات الثانيه .. وقلنا نمشي لولنقونق نتغدى فيها ونفر فيها ونرجع سدني ..
وصلنا وتغدينا وصلينا و رجعنا سدني قبل المغرب .. ولله الحمد والمنه ..

* كياما كتبت يوميه كامله عنها قبل فتره
* الجو بأول يومين ما شفنا الشمس ابداً وكان غائماً تماماً ولطيف .. اليوم الثالث كان مشمس ولطيف ،
* كان من المقرر زياره الشجرة الي على شكل رجال راكع الى القبله لكن للأسف الوصف ما كان دقيق ولا لقيناها .. من هنا
* صحبه طيبه كانت معي ..
* الدكتور عمر سمانا الطامعين على سالفة الشلالات واعجبه الشاطئ الي عطيناه وانبسط كثيررر هو اهله ..
* وصولك الى هذه النقطه يعني انك قريت الموضوع كامل .. فـ شكراً لك

http://live.islamweb.net/Anasheed/138295/3266506.rm

السلام عليكم ورحمة الله وبركاته ..
دائماً افكر اني لازم ارجع اصور البنوراما للجسر والاوبرا مره ثانيه ، وارجع للمشرد برضوا الي كان يكسر الخاطر ،
لان نتائج الأولى ما عجبتني وخاصه ان الترايبود الي كان معي ما كان ممتاز ،
الاسبوع قبل الماضي قررت اني اطلع برحله تصويريه لحالي ما معي احد يقولي " يخوي ملينا خل نمشي مكان ثاني " او " ما لي خلق تجلس تصور هنا مليت خلونا نمشي "
.. صحيت بدري .. جهزت اغراضي ، طليت من الشباك لقيت الجو رااائع وغيوم .. لكن بارد ، افطرت ودخل وقت صلاة الظهر صليتها وطلعت !
المهم طلعت وكان في نفسي اني اصور يوميه + الي رايح عشانه ،
شغلت الانشوده الي ماسكه معي لها فتره ، ومسكت طريقي ،
مع الجو الرهيب والانشوده الرائعه .. ما كنت افكر بشي ، ذهني صااافي ..

هنا كان بدايتي .. طلعت من المجمع السكني الي ساكن فيه وصورة المنظر ،

وصلت محطت القطار وكانت الساعه ..

بعد وصولي لوسط سدني .. كان الخيار اني انزل في بديتها او اني اكمل لين منطقة الاوبرا والجسر ..
قررت اني انزل في البدايه وامشي واصور ، المسافه من البدايه الى الاوبرا تقريباً 3 كيلوا او اكثر ..
لكن الطريق جميل ولا حسيت بطوله ابداً .. يمكن لاني قد مشيته اكثر من مره وتعدوت عليه

المبنى هذا اسمه QVB او Queen Victoria Building ، الي اعرفه انه كان قصر الملكه فكتوريا ، وبعد ما ماتت صار سوق وفيه بقايا من اغراضها
http://www.qvb.com.au/
لكن الحين صار مول ،

وصلت للمكان الي فيه المشرد وصورته وطلعت بموضوع حلو نشرته في كذا موقع ، بحطه هنا بإقتباس زي ما نزلته بالمواقع الثانيه

كوت

السلام عليكم ورحمة الله وبركاته ،

أتذكرون صورة ذلك المتشرد !؟
لمن لا يعرفها عنونت الصورة وقتها بـ أريد ان أعيش "I Wanna live"
كان بائساً .. وعندما حاولت محادثته لم يعرني أي انتباه ..
قررت الذهاب إلى نفس المكان .
لأرى هل لازال ينتظرني .. مشرداً ينظف الأحذية !
وصلت إلى مبتغي .. كان عازف القيثارة يصدح ..

وبما أني لست من هواه الموسيقى
فقد عادت إلى أُذناي تلك الأنشودة كنت اسمعها و أرددها في نفسي طوال ذاك اليوم
" قف في الحياة .. ترى الحياة تبسما "
وقتها تذكرت المشرد .. وبدأت بالبحث عنه ..
حتى وجدته وسط الزحام ...
هنـاك .. مازال هناك .. ينظف الاحذيه .. " مازال " !!

اقتربت منه هذه المرة .. ولم يكن حزيناً كما كان سابقاً ,
كان يعمل .. ويعمل .. وأنا أرقبه من بعيد .. وطوال ذاك الوقت كان مبتسماً

أخيرا قررت الاقتراب منه .. واخذ الموافقة منه للسماح لي بتصويره !
احتفظت بدولار في قبضة يدي كي لا يراه ..
وعندما انتهى من تنظيف حذاء احد المارة.. كانت يده ترتفع معلنه " خمس دولارات " هي قيمة التنظيف

اقتربت منه ..و هو ينظر إلى حذائي !!
سألته هل تسمح لي بالتقاط الصور لك ؟
قال " نعم نعم .. بالطبع !
فتحت يدي وقلت هذا دولارٌ لك.. ووضعته مع باقي السنتات في الوعاء بجانبه ،
التقطت هذه الصورة الاخيره ..
وغادرته ... بعد أن زرع الفرح في نفسي طوال ذاك اليوم !

وانتهى يومي بهذه الصوره البنوراميه ،
http://fc06.deviantart.com/fs32/f/2008/234..._IAMSORRY87.jpg

بعد ما انتهيت من قصة المشرد ، قررت اني اروح لمنطقة Circular Quay
وهي المكان الي ممكن اشوف فيه الاوبرا والجسر ، رحت لمحطت القطار شفت تكسي فيه مكان للـ Wheelchair وجالس يركب حرمه فيه

طلعت للPlatform واخذت ترين وطلعت للجهه الثانيه من الـ Circular Quay وتسمى
Milsons Point و تعتبر خارج الستي لانهم تدخل مع نورث سدني ، هناك
وصورت القطار الي طلعت فيه

ومشيت مسافة على ما وصلت للمكان الي ابيه ، كان وقت العصر وشكل الاوبرا حلو ونصها شمس

طلعت ببنوراما بالنهار نزلتها بـ DA تقدرون تشوفونها هناك ..

انتظرت اكثر من ساعتين وانا اتفرج على العالم ، الصينيين الي كانوا يصيدون سمك بذا المكان :hypnotize ،
وفرحتهم لما صادوا سمكه وجلسو يصورون معها .. وحالتهم حاله .. وانا ميت ضحك عليهم ،
لين حل الظلام ، وبديت اصور مره ثاني على الغروب واجرب الغالق البطيئ بالجهاز الي شريته
وصلته لـ 2.30 في بعض الصور ، لكن كانت تجربه وما كانت الصور حلوه ،
وبعدها طلعت يمين الجسر لاني كنت يساره كل الوقت .. يمين الجسر فيه luna park وهي مدينة الملاهي الموجوده في سدني على ما اضن
كنت ابي اصور مدري وش اسمه بالغالق البطيء ،
المهم هذي مجموعة الصور الاخيره ..

<< هنا كان الغالق دقيقتين ونص ، تقدرون تشوفون الاعدادت بملف الصوره

بعد ما خلصت الصور كنت منهك لدرجة ان ودي ارمي شنطة الكام وامشي واخليها ،
وما فيني امشي لمحطت الترين .. بالصدفه اكتشفت ان جنبي Wharf للـ Ferry ، اخذته ورجعت للـ circular quay
ومنها اخذت ترين لين شقتي ، وما كنت مصدق اني وصلت اخيراً ،

Done